Tene muno kwari na muthuri weri mugwemi na aturaga na mwongia wake.muthenya umwe ari ugwemiri agikomana na cimba ikigwema giakuri.Muthuri uria akithii agikethia cimba magitana ‘mwathi’ tondu monthe kamagwemaga. muthuri akira cimba ‘mbikaraga gukui,ngigwema giakuria’.nake cimba akira muthuri ‘wananii mbikaraga gukui,ngicaria giakuria’.
Cimba na muthuri ucio makivanga magwemage vamwe.cimba ikira muthuri uu; “wauraga nyamu ukarutaga nyama cia mavu ukinengera icio ciingi ukithii nacio cionthe”.makirikanira uguo.Riu cimba na muthuri uria magwemaga mona nyamu cimba ikiria nyama cia mavu nake muthuri agioca icio ciingi ndune akivirira mwongia akiruga makiria.indi cionthe muthuri enukagiria mwongia nyama iria ndune.
Muthenya umwe ri,mwongia akiuria muthuri atiri; “tondu undetagira wa nyama iria ndune ri icio ciingi uviraga kuu?”muthuri akimwira icio cia mavu kuri mwathi avaecaga.mwongia akierewa kuri mundu muka wingi utwaragirwa icio cia mavu.mwongia agikararania na muthuri muthuri akiuga “niguo”.mwongia wakimenya muthuri aumagara nikwa akamuthingata akone mwongia ucio unengagirwa nyama cia mavu.
Gwakia muthuri evaririe wauria evaragiria wakiuma akithii.mwongia akimuthingata ethithite niguo ndakonwe.Na tondu muthuri na cimba nimatigaga mategete mitego agendaga agicuthagira one kana nimugwatiu,ethira vatari kindu akithii vengi.Tondu muthuri niwaici varia atigite mitego agendaga akithiururuka vau mutego waari.mwongia nwa wamumite vuva,na tondu ndamenyaga kana kwari na mitego athiire wagikinya wakigambwa kava!mwongia wakiuga mbu “ui!ui!ui!”
Riu muthuri akivinyura kuthii gucuthira nayo cimba iri mwena ucio wingi niyegwire wekivinyura.cimba ikira muthuri, “ndurathe nyamu undetere nyama cia mavu ndie”.yeciragia ni nyamu yagwatitwe.Riu muthuri agikira mugwi rugari nirwaremaga,nweka atetemaga njara,ageria kuratha akiremwa.muthuri akira cimba “vauma nyamu itagwa mbia na vava kithakari”,nayo cimba ikimwira “reta nyama undutire cia mavu ndie nikwa umbigira atia?”
Mari wavau mbia igiuka ivenya igicuthira ikimere, “iya!mugwete kuthinwa nino iri mutegori munyinyu na kuri ingi natiga navaria itigaritie ruthira rumwe wegitwa”.cimba egwa iyo itagaritie kathira kamwe itwe wigicoka niguo yambe irie iyo muthuri agitigwa arathe iyo ingi.Tondu muthuri niwamenyete ni mundu wagwatitwe akithii agikinyuka giteng’u ,mwongia akiuma,akirwa ni muthuri aure kura.mwongia wakivinyura akithii.cimba acokete magicemana na muthuri,akirwa “ui nyamu niyathauka yavinyura,wananageria gwikia mugwi niwamivitia.uguo niguo muthuri avonokirie mwongia.
Kuma ruganori ruru niturona ati ni uvavu watumaga mwongia akinyire muthuri kithakari,ni tondu ndeganagira na nyama iria aretagirwa ni muthuri.kirikaniro gitwiraga ati nituvatie kwiganira na kiria Ngai aturathimite nakio,tondu tungirega kwiganira nwatugwe wiviari ta wa kwia.